Gracias na Dios, awor aki hopi hende ta konsiente di e konsekenshi di huma, ku ta rezultá den ménos hende ta huma esnan últimanan aña. Pero pa esnan ku aínda ta huma i ke stòp, aki tin algun konseho:

NO PURBÁ DI STOP DI RIPIENTE
95% di esnan ku purbá di kita huma di un bes, ta kuminsá huma nobo. Nikotin ta adiktivo i ta hasi bo seso aksumbrá na dje, kousando keiru.

PURBÁ TERAPIA DI SUSTITUÍ NIKOTIN
Falta di nikotin ta trese depresion, frustashon i iritashon. Terapia di sustitui nikotin por reduci esaki.

REMEDI
Aunke mi no ta un gran fan di remedi, den sierto kaso remedi preskrito ta nesesario. Bo dókter por preskribí remedi ku ta yudá pa reduci e keiru pa huma, kambiando sierto sustansia den bo seso. E remedi aki tambe ta hasi ku si bo rependí i huma, sigaria no ta smak na bo.

NO HASIELE BO SÓ
Papia ku bo amigunan, koleganan, i famia ku bo ta bai kita huma i ku bo ke nan sosten.

MENEHÁ STRES
Un di e rasonnan pa huma ta relaksá nos. Ora bo kita huma, bo lo tin ku haña algu mas pa yudabo menehá stres. Purbá masaje, skucha muzik, of kuminsá Yoga of Tai Chi.

EVITÁ
Evitá alkohol i kosnan ku hasi bo ke huma, manera kofi. Kambia pa te pa un tempo.

MANTENE BO KAS LIMPI
Tira tur ashtrai i limpia bo kas bon pa eliminá e hùmù di sigaria. Bo no ke nada ku ta rekordabo di huma.

HASI EJERSISIO
Kuminsá un bida mas salú pa hasi ejersisio i kome salú.

HASIE PA BO SALÚ
Si tin un rason pa kita huma, e ta simplemente pa bo salú. Kuida bo mes!